GRUPO CUEVAS ASISTE UN ANO MÁIS A EUROSHOP

Un ano máis, en Grupo Cuevas apostamos por estar onde se define o futuro do retail. Estes días, parte do noso equipo estivo presente, da man de Grupo Euromadi, en “EuroShop – The World´s Nº1 Retail Trade Fair “, a feira internacional de referencia que se celebra en Düsseldorf e que reúne a máis de 1.800 expositores coas últimas solucións en tecnoloxía, equipamento comercial, márketing no punto de venda e experiencia de cliente.

En representación do noso grupo asistiron Martín Caride, director de Expansión, Obras e Mantemento; Armando Valdés, do equipo de Mantemento en Asturias; Víctor C. Lorenzo Dávila, director de Sistemas e Innovación; e Marta Cid #Vidal, directora de Marketing e Comunicación.

Durante a visita o noso equipo percorreu distintos espazos expositivos para analizar propostas de retail márketing, conceptos e deseño de tenda, iluminación, mobiliario de frío, materiais e acabados, así como tecnoloxías aplicables ao momento de venda orientadas á promoción de produto, a venda cruzada e a mellora da comercialización de frescos. Ademais, mantiveron encontros con provedores actuais e potenciais para avaliar solucións que permitan seguir evolucionando aos nosos establecementos.

No ámbito tecnolóxico, Víctor centrou a súa visita no HUB-IT, para coñecer de primeira man as últimas innovacións do sector, con especial atención á intelixencia artificial e ás ferramentas que permiten optimizar procesos e mellorar a eficiencia operativa.

Desde a área de Expansión, Martín e Armando analizaron todos os avances en equipamento comercial, refrixeración, iluminación e solucións construtivas que contribúan a crear espazos máis eficientes, sostibles e adaptados ás novas demandas do cliente. Pola súa banda, como responsable de Marketing, Marta profundou en tendencias de retail márketing e experiencia de compra co obxectivo de seguir mellorando o punto de venda.

A participación en EuroShop permite a Grupo Cuevas coñecer de primeira man as tendencias internacionais do sector, incorporar innovación aos seus supermercados e seguir mellorando o servizo ofrecido ao cliente final mediante tendas máis eficientes, tecnolóxicas e orientadas á experiencia de compra.