RECIBIMOS A VISITA DO CIFP PORTOVELLO

Na xornada de onte, recibimos con enerxía aos alumnos do 2º curso de Xestión de Vendas e Espazos Comerciais do CIFP Portovello, de Ourense. Durante a visita á nosa plataforma loxística no Polígono de San Cibrao das Viñas, coñeceron os detalles de preto do funcionamento da mesma.

A través desta visita guiada, ademais de coñecer un pouco máis sobre a historia de máis de 150 anos de traxectoria de Grupo Cuevas, os estudantes puideron observar en acción algunhas das innovacións tecnolóxicas que simplifican a loxística diaria como o sistema do picking por voz, que permite aos operarios recibir instrucións da recollida de produtos mediante voz. Outro dos pasos que puideron coñecer foi o da empaquetadora automática, que optimiza o proceso de embalaxe dos produtos. Estas innovacións melloran a eficiencia operativa e, á súa vez, son exemplos prácticos de como a dixitalización e a automatización transforman o sector loxístico, facéndoo máis áxil, preciso e profesional.

Desde Grupo Cuevas estamos moi comprometidos coa formación de futuros profesionais do sector, ofrecendo espazos onde os grupos que nos visitan poidan aprender e entender as dinámicas reais do mundo laboral no que nos movemos.